ما بعد تمرد

كتبت في تدوينة قبل كدا باسم "تمرد من غير بديل لن تصح ابدا"

واستعرضت فيها اسباب رفضي الامضاء على استمارة تمرد وتخوفي من اللي هايجي بعدها واشرت فيها ان الاحزاب واخدين تمرد لمصالحهم الشخصية

ورغم كدا كنت مع احتشاد المعارضة والنزول 30 يونيو للضغط على مرسي ونظامه اللي اثبت فشله

ونزلت يوم 30 يونيو التحرير ونزلت يوم 2 يونيو الاتحادية

وبعد الخطاب الاحمق الاخير لمرسي "بتاع الشرعية "قلت انه لازم يمشي لانه اغبى من مبارك

واتعزل مرسي وفرحت جدا واعتبرت اللي حصل موجة ثورية جديدة من ثورة 25 يناير 2011 وقعدت اراقب بحذر الاجواء السياسية 

دلوقت احنا قدام سيناريو كبير –من وجهة نظر ناس كتير هو البديل القوي - وهو رئيس المحكمة الدستورية لمدة 9 شهور واللي جايبه الجيش 

لكن عندي شوية نقاط كدا كتعليق على بعض الاحداث

اولا : السيناريو اللي بيحصل دلوقت يدل ان الجيش دايما مع مصلحته لا مع مصلحة الثورة ففي 25 يناير الجيش ضغط على مبارك عشان  يتنحى لانه كان رافض سيناريو التوريث ومع مرور الوقت لما حب يركب ع الثورة والثوار كشفوه كان بينتهك الحريات بشكل فاضح لحد ما جه مرسي وادى المجلس القلادة واختفى دور الجيش من على الساحة لحد ما الجيش ظهر تاني مع تمرد و30 يونيو لمصلحته مرة تانية عشان يمشي الاخوان وعشان يظهر بمظهر البطل قدام الشعب واولهم الثوار وعشان يخلي اللي كان بيقول امبارح يسقط يسقط حكم العسكر يقول النهارده الجيش والشعب ايد واحدة

ثانيا : الفترة اللي فاتت بعد ماحللت الاحداث كدا من وجهة نظري صدقت ان الليلة مطبوخة مع الجيش من قبل 30 يونيو والادلة كتير ومنها مؤتمر "ما بعد الرحيل"

ثالثا : الثوار اللي فاكرين نفسهم بيستغلوا الظروف لصالح الثورة من تعاطف للجيش ووقوفه مع الثورة مع اعترافهم بجرايمه اللي فاتت دول انا شايفاهم اكبر مغفلين دلوقت لان الجيش بيلاعب الكل زي الماريونت وهياخد مصلحته م الكل وبعدين هايسحب البساط من تحت رجل الكل

رابعا : عدلي منصور من يوم توليه السلطة المؤقتة وبيحاول ينجز لحد دلوقت شايفاه ملتزم بالدور بتاعه وحقيقي فرحت جدا ان البرادعي اتعين نائب للرئيس لكن الاعلان الدستوري بالنسبالي مليان بالافخاخ ودا خلاني اشك فيه بعدين لما رحب بالتعديلات واحنا دلوقت مستنيينها فقلت آجل حكمي عليه شوية لما نشوف ها زي مابيتقال طرطور في ايد الجيش ولا رأيه  مستقل ويقدر يقف للجيش لو مثل عقبة قدام الثورة .. الايام الجاية هاتبين

خامسا :  انا ضد الازدواجيه اللي وقع فيها ثوار كتير

• الموقف من العسكر اتبدل وبقى الجيش حامي الشعب ونسيوا كان عامل فينا ايه
•  الموقف من السعوديه والخليج اتغير بمجرد ما بعتوا منح -الموقف من الشحاته اتغير , القرض كان شحاته لكن تبرعات الدول العربيه والمستثمرين المصريين مش شحاته
• الموقف من امريكا اتغير زمان بنعاديها عشان بتفرض سلطتها علينا ودلوقت بنتسابق عشان تعترف ان اللي حصل ثوره شعبيه
• الموقف من روسيا اتغير بدل ما كانت سلبيه ومش بتساعدنا دلوقت بقت حلوه عشان ساندت الجيش وهي بتعمل كدا عشان تضرب ف امريكا مش عشان سواد عيوننا
• الموقف من الدم اتغير لما حد يموت تبعنا تطلع الانسانيه ولما حد يموت تبعهم يبقى احسن يستاهل "كدا انت مفرقتش كتير عن اللي شمت فيك لما مت"
•  الموقف من بعض مواد ف الدستور القديم اللي بقت موجوده في الاعلان الدستوري اتغيرلمجرد ان الاعلان طلع بعد 30 يونيو وعزل مرسي وقال ايه كلها كام شهر ويتغيروغيرها كتير

سادسا : وجود مؤيدي مرسي في النهضة ورابعة والحرس الجمهوري واكتر من مكان دا مش لازم الواحد يتغاضى عنه حتى لو كان عدد المؤيدين قليل وخصوصا بعد مجزرة الحرس الجمهوري واللي لا اقنعتني فيها رواية الجيش ولا رواية الاخوان لان الاتنين متعودين ع الكدب لكن ايا كان فيه دم اتسال والدم المصري كله حرام و لازم يتعمل تحقيق ويتحاكم اللي كانوا السبب سواء جيش او اخوان وضمان حرية التعبير للكل مع محاكمة المجرمين 

هاخد جزء من التدوينة اللي فاتت عن تمرد لما قلت ..

" الشيء الاهم دلوقت من وجهة نظري دلوقت للمعارضة المدنية
1-       وحد صفك رغم اختلافات الايدلوجيات
2-      ابني بديل في الشارع مع الناس , اوصل للناس , اعرف مشاكلهم , اتواصل معاهم , خليهم يثقوا فيك , اخلق بديل لثقافة الزيت والسكر , ابني جسر بينك وبينهم , خليهم يحسوا انك فعلا قادر تشيل مسئوليتهم وقتها بس نقدر نتمرد ونسحب الثقة ونخلي مصر على مزاجنا "
 
يمكن اغلبنا شايفين ان ايام 30 يونيو الشعب كله اتوحد رغم اختلاف الايدلوجيات على فكرة رحيل مرسي لكن لحد دلوقت مفيش حد من القوى المدنية بنى بديل ف الشارع مفيش حد قدم للناس بديل عن الاخوان , كل المعارضة لعبت على مساويء الاخوان عشان يكرهوا الشعب فيهم طب فين الحاجات الكويسة البديلة اللي المعارضة بتقدمها مفيش !
 
شايفة من وجهة نظري البسيطة ان لازم الايام الجاية نشتغل على البديل في الارض , الاحزاب تشتغل في الشارع تبني قواعدها الجماهيرية تخدم الناس بجد مايكونش كل همها السعي للسلطة فقط , المعارضة لازم تكون حرة رأيها نافذ تقدر تقول لا لاي فصيل هياخد الثورة في مسار مش مسارها لازم المعارضة تكون فعالة مش كرتونية
مش لازم نتغر ان في 4 ايام اتعزل مرسي لان الموضوع مش بالسهولة دي وممكن تكون لعبة اكبر مني ومنك بقيادة الجيش عشان يفشل كل التيارات السياسية عشان يخلي الشعب من نفسه يرجع يترمي في حضن الجيش من تاني

كلمة اخيرة : 

هتاف دايما كنا بنردده هما اتنين ملهمش امان .. العسكر والاخوان