عن ما بعد العزل
نزلت 30 يونيو 2013 ولحد ما طلعلنا السيسي ببيان عزل مرسي وتعيين عدلي منصور
واعتبرت اللي حصل موجة ثورية جديدة تابعة لثورة يناير
بعدين هياج اﻻخوان واعتبار اللي حصل انقلاب عسكري والحشد المحلي والدولي لدا
وبعدين تفويض الجيش "وكنت اتكلمت عنه ف بوست سابق"
بعدين فض اعتصامي النهضة ورابعة وعمليات القتل واﻻعتقاﻻت من جانب اﻻمن وعمليات القتل والحرق والتهديد من جانب اﻻخوان
وﻻني حد متسقة داخليا مع افكاري فانا ضد تصرفات اﻻمن الوحشية وف نفس الوقت ضد تصرفات اﻻخوان وضد رجوع فلول الفساد وضد خروج مبارك وشلته
يطلعلي حد فكيك بقى يقوللي امال عصرتي على نفسك ليمون وانتخبتي مرسي ليه
هقوله بعد انتخابي لمرسي مباشرة قلت " مش معنى اني انتخبت مرسي اني مش هعارضه ﻻ المعارضه عندي انه اول مايغلط انا اول واحدة اعارض " ودا حصل
شايفة على المشهد رجوع للفلول والدولة البوليسية مع فرض الطواريء وحظر التجول وممارسات الشرطة واﻻعتقاﻻت
شايفة كمان كمية ازدواجية عجيبة ويا اما تكون ازدواجي يا اما تكون حكوكي سبوبة او خروف
مبقاش فيه حد عاوز يشغل مخه
بقى لكل تيار اتباعه ورموزه اللي بتحرك خرفانه
مبقاش فيه انسانية
وﻻ بقى فيه دولة قانون
واحنا بنلعب ثورة وبيتلعب بالكل
قلت قبل كدا السيسي لعيب بيحاول يحرق كل الكروت ع الساحة
وقلت كمان بس قبل 30 يونيو ان تمرد مع عدم وجود بديل هتلبسنا ف الحيط
وقتها كنت خايفة من التيارات اﻻسلامية واستبعدت العسكر
لكن احنا دلوقت مش في دولة عسكرية بمعنى الكلمة في ظل وجود رئيس مؤقت وحكومة ورئيس قوات مسلحة بيمشوا البلد حتى لو صوريا
بعترف ان الصورة مش واضحة وكتير بيفتوا انهم فاهمين
اللي يقولك سيناريو مصر 54 واللي يقولك كوبا واللي يقولك معرفش فين
وهما مش عارفين ان اللي بيحصل سيناريو جديد متحرقش ف اي فيلم قبل كدا
وعشان تقدر تحكم ﻻزم تصبر وتستنى عشان تحكم صح ودا اللي بعمله
حقيقي فقدت اﻻمل ف البلد وحاسة اننا في كبوة خصوصا بعد انقسام الشعب لتلات فرق كبار كله بيضرب ف كله وصحيح معنديش امل حاليا بس انا عاوزة البلد دي احسن بجد
عشان كدا ﻻزم كلنا نفهم ونعرف ازاي نتعامل مع واقع ﻻزم نجيد قرايته
ﻻزم نغلب مصلحة البلد على مصالحنا ومصالح تيارنا
لو انت م اﻻخوان اعرف ان قياداتك بتتاجر بيك وبدمك وبتغسلك مخك عشان مصالحها ، متفكرش انك لو سكت التنظيم هيختفي مافي ستين داهية التنظيم بس تفضل مصر عالية وحرة ، متفكرش انك كدا بتحميها اوعى يتضحك عليك وتبقى من اللي معمولهم غسيل مخ من قيادات اﻻخوان ، حاسب على بلدك اوعى تساهم في ضياعها بسبب مصالح جماعتك ، متضربش ف مصري زيك وتقتله عشان شال مرسي ﻻنه شايف مصلحة البلد مش معاكوا وافتكر ان اللي انت دلوقت بتحرمه لما انت كنت ف السلطة كنت بتشجعه وموافق عليه عشان مصلحتك
لو انت م الفلول اللي مش متورط في فساد او حزب كنبة اعرف ان مبارك وكل شلته عالم فاسدة وحرامية وخربوا البلد ونهبوها ، متكرهش الثورة ﻻنها قامت عسا تخلص البلد م الفساد اللي انت كنت ساكت عليه عشان مصالحك ، جرب مرة تحب البلد بعيد عن مصلحتك هتلاقي موقفك مختلف ، جرب مرة تتصالح مع البلد وتكون ابنها .. صدقني هتتقلب نظرتك للامور
لو انت محب للجيش بلاش الثقة العميا دي واعرف كويس كل اللي بيعمله الجيش والشرطة ﻻنه زي ماعمل ف غيرك هيجي اليوم اللي هيعمل فيك ، حب بلدك بعيد عن مصلحتك شوف مصر تستحق مننا ايه واعمله وفكر كويس في ممارسات الشرطة والجيش دي لو اتعملت معاك هاتقول ايه وﻻ هتعمل ايه
لو انت م المتعاطفين ﻻزم تبص لكل الفرق في اطار الظروف المحيطة ومتاخدش تصرف بمعزل عن غيره او عن الظروف اللي حصلت فيه عشان تكون حقاني ومنصف مش مايل مع حد ضد حد نتيجة اختلافك معاه .. خليك موضوعي
لو انت ثورجي وبتقول زيي يسقط كل من خان فلول عسكر اخوان ﻻزم تكون مثل يحتذى بيه ﻻزم تكون واقعي وموضوعي ومنصف ومع الحق متخليش اي حاجة تعميك عن الحقيقة اعرف البلد مصلحتها فين واعمله واجه الظلم والفساد انصر الحق وصاحبه جنب مصالحك خالص
اخلق بديل ع اﻻرض اخلق بديل ابوس ايدك
اشتغل اعمل قواعد جماهيرية عرف الناس ان الثورة الحقيقية لمصلحتهم
شايف ثورتك ماتت اعمل ثورة جديدة ضد كل وﻻد الوسخة
عافر وثابر
يمكن انا بكتب دا في قمة احباطي ويمكن محدش يهتم انه يقرا كلامي
يمكن محدش ف البلد عنده امل
بس ﻻزم مصر تتغير ﻻزم
تعليقات
إرسال تعليق